प्राथमिक पूँजी बजारमा गुणस्तरीय विकास (Qualitative Development) गर्न बोर्डबाट "नेपालको प्राथमिक पूँजी बजार विकास सम्बन्धी श्वेतपत्र, २०८३" सार्वजनिक।

८३ साउन २१: बोर्डबाट सार्वजनिक गरिएको आर्थिक वर्ष २०८३÷८४ को पूँजी बजार नीतिको नियामकीय सुधार कार्य अगाडि बढाउने क्रममा सार्वजनिक निष्काशन व्यवस्थामा गुणस्तरीय विकास (Qualitative Development) का लागि प्राथमिक पूँजी बजारको दीर्घकालीन लक्ष्य (Primary Market Longterm Development Vision) सहित "नेपालको प्राथमिक पूँजी बजार विकास सम्बन्धी श्वेतपत्र, २०८३" सार्वजनिक गरिएको छ।

              उक्त श्वेतपत्रले नेपालको प्राथमिक पूँजी बजारको विद्यमान अवस्था, कानूनी तथा संस्थागत सीमाहरू र आगामी दशकका लागि आवश्यक रणनीतिक सुधारका दिशा प्रस्तुत गरेको छ। साथै नेपालको प्राथमिक पूँजी बजारलाई पारदर्शी, निष्पक्ष, प्रतिस्पर्धी, दक्ष, प्रविधिमैत्री र अन्तर्राष्ट्रिय असल अभ्यासअनुकूल बनाउन नीतिगत, कानूनी, संस्थागत र कार्यान्वयन सम्बन्धी एकीकृत रूपरेखा (Integrated Policy Framework) प्रदान गरेको छ। यस श्वेतपत्रमा नेपालको हालसम्मको प्राथमिक बजारको नियमन सम्बन्धमा भएका कामकारवाही, वर्तमान पूँजी बजारको अवस्था, समस्या, चुनौती तथा समाधान, आगामी रणनीति, अन्तर्राष्ट्रिय व्यवस्था एवं अनुभव लगायतका विवरणहरूसमेत समावेश गरिएको छ।

      श्वेतपत्रले दीर्घकालीन दृष्टिकोण तय गर्दै प्राथमिक बजार सुधारका लागि तीन-चरणीय कार्यान्वयन रणनीति अघि सारेको छ, जस अन्तर्गत पहिलो चरणमा एक बर्षभित्र नीतिगत तथा कानूनी सुधार (ऐन/नियमावली संशोधन, Book Building समीक्षा आदि), दोस्रो चरणमा एकदेखि दुई वर्षभित्र संस्थागत तथा प्रविधिगत सुदृढीकरण (Digital IPO Platform, e-KYC, RegTech, SupTech आदि) र तेस्रो चरणमा दुईदेखि पाँच बर्षभित्र उन्नत बजार विकास (पूर्ण रुपमा बजार-आधारित मूल्य निर्धारण, QIB / Anchor Investors को प्रवेश आदि) गर्ने कार्यान्वयन योजना राखेको छ। त्यसैगरी, निष्काशन तथा बिक्री प्रबन्धक, लेखापरीक्षक र क्रेडिट रेटिङ संस्थाहरूको Due Diligence दायित्व स्पष्ट गर्दै थप प्रभावकारी र उत्तरदायी बनाउने लक्ष्य समेत श्वेतपत्रले लिएको छ। यस श्वेतपत्रले IPO प्रणालीको सुधारमा मात्र सीमित नरही राष्ट्रिय पूँजी निर्माण, निजी क्षेत्रको प्रतिस्पर्धात्मक विकास मार्फत यसलाई नेपालको समग्र आर्थिक रूपान्तरणको रणनीतिक आधारपत्र (Reference Policy Document) को रूपमा कार्यान्वयनमा ल्याउने विश्वास बोर्डले लिएको छ। साथै आगामी दिनमा सरोकारवालाहरूसँग निरन्तर परामर्श गर्दै प्रस्ताव गरिएका सुधारहरूलाई चरणबद्ध रूपमा नीतिगत, कानूनी, प्रकृयागत तथा प्रविधि सुधारमार्फत कार्यान्वयनमा ल्याइने छ।

      बोर्डबाट सार्वजनिक गरिएको श्वेतपत्रबाट लगानीकर्ताको प्राथमिक बजारमा सहभागिता तथा साक्षरता अभिवृद्धि एवं प्राथमिक बजारका उपकरणहरूको विकासमा महत्वपूर्ण भूमिका खेल्नुको साथै नेपालको प्राथमिक पूँजी बजारको विकास तथा गुणात्मक सुधार भई आर्थिक रुपान्तरणका लागि आवश्यक दीर्घकालीन पूँजी परिचालनमा योगदान पुग्ने बोर्डको विश्वास रहेको छ।

उक्त श्वेतपत्र अध्ययन गर्न तल दिईएको लिंकमा क्लिक गर्नुहोलाः

https://shorturl.at/yzvqu